17 单膝跪下

  周末黄昏，蓝带青来到海边，牵着青小手走过弯弯曲曲的石春路，到达一所蓝白地中海小餐馆，桃木傢俬摆设陪衬简洁吊扇，阵阵海风迎面吹来，一种无可抗拒的舒适自然，洗涤了蓝内心的鬱闷烦躁⋯⋯餐厅内里调暗灯光，餐枱上点了香氛蜡烛，散发幽幽热带水果香气，吧枱上一套胆机正播放轻快悠扬乐韵⋯⋯
  青被四周围环境触动，心情轻松自在，蓝细心地为她拉櫈坐下⋯⋯
  青（嘴角向上翘）：今日係咩日子呀？点解咁浪漫嘅？
  蓝（低头发笑）：你唔知咩？你估下吖？
  青（傻了眼）：啊！係唔係相识半週年？
  蓝忍住笑，摇摇不语。
  青（摸一摸颈上的生日礼物颈链）：又唔係你生日，又唔係我生日⋯⋯
  侍应正小心翼翼，从厨房捧着热汤沙律，放在餐枱上
  青（气馁）：有冇贴士先？
  蓝（咬一下上唇）：啊！贴士係同我哋有关嘅⋯⋯
  青嘟嘟小嘴，皱着眉头，一面低头喝汤，一面继续猜谜。
  蓝（掦一下眉）：啊！咁你有冇野未话比我听架？
  青（愕然假惺惺）：唔吓⋯⋯乜我有野未讲你听咩？
  蓝（摸一下耳珠）：啊！肯定没有？
  青（摸不着头脑）：你今日好似怪怪地咁⋯⋯
  蓝额头冒汗，心里一面叫自己放轻松，一面把希腊沙律端在青面前，青比平时开胃，三扒两拨已经吃了一大碟，心满意足地放下刀叉，轻托着香腮⋯⋯
  青（意气风发）：好啦！意粉又食完啦！可以话俾我听今晚搞乜鬼呢？
  蓝（口震震）：不如食埋个甜品先呢？
  青望着这杯士多啤梨无花果绿茶布甸，眉头一皱：哎呀！唔知点解我闻到士多啤梨想呕⋯⋯
  蓝（瞪大眼睛）：啊！你以前好钟意食士多啤梨架喎⋯⋯不过，唔紧要！咁你净係食绿茶布甸吖⋯⋯
  蓝细心的为青拨开士多啤梨和无花果等装饰，期待她仔细品嚐布甸味道，谁不知，青忽然衝入洗手间呕吐⋯⋯
  蓝焦急的隔着门询问：你见点啊？係咪好唔舒服啊？
  青咕嚕咕嚕地回应，双眼通红打开门，蓝扶着青坐下来休息⋯⋯
  青用纸巾抹去眼睏泪水：哎呀！唔知係咪食得太快呢⋯⋯
  这时，侍应从后捧着一大束红玫瑰递给蓝，蓝在青面前单膝跪下⋯⋯
  蓝（深呼吸满面通红）：青，今晚我有啲嘢同你讲，呢个时刻我等左好耐⋯⋯虽然我同你拍拖只係大半年，但係我真係好钟意你⋯⋯好想你一生一世都可以陪住我⋯⋯
  青抱着一大束鲜花不知所措，凌乱地回应：吓？点解想要结婚呢？
  蓝（焦急慌乱）：因为我哋想两个人一齐生活，组织一个新家庭，可以多啲时间一齐⋯⋯
  青（冷静分析）：但係⋯如果我哋结咗婚之后⋯我哋两个经常要飞，各有各忙，分隔两地工作，聚少离多，果时你会唔会后悔结婚呢？
  蓝（沉思）：嗯⋯⋯
  青（疑惑）：我未有心理准备啊！⋯好似争d野喎！
  蓝（尷尷尬尬）：係啊！⋯⋯你未食甜品⋯⋯
  青拿起匙羹，轻轻的捞起一小羹绿茶布甸，隐约听到金属的碰撞声，仔细观看，原来有一隻指环藏在布甸内⋯⋯
  青看到戒指的时候，奇怪心里没有半点感动，反而为这个情况，倒抽一口凉气⋯⋯
  蓝拿起指环抺乾净，诚心正意：青，你愿唔愿意嫁俾我？⋯我想你做我太太⋯俾我照顾你一生一世⋯⋯青发呆了，张开嘴想回话，一时间不懂反应⋯⋯
  青（战战兢兢推开指环）：蓝，真係太突然啊！都唔知讲咩好，你会唔会觉得我哋太快结婚呢？
  蓝（坚定眼神）：唔会！结婚有好多野搞架！安排得来差唔多架啦！
  青（忧虑）：啊！但係，上星期我同旧上司食饭，倾左復职嘅安排，两个星期后会安排面试，顺利嘅话我可以返机组，会签三年合约啊！
  蓝（愕然嬲怒）：吓！上次你咪话未肯定嘅？咁大件事你都唔讲比我知？依家confirm晒细节，先循例通知我⋯⋯
  青（犹豫不决）：但係上机组做，可以四围走见识一下，係我心里便嘅梦想⋯⋯何况，结婚咁大件事，我觉得慢慢来，从长计议比较好⋯⋯
  蓝（揑着拳头有点忟憎）：好啊！又係梦想⋯⋯咁你考虑好再话比我听吖⋯⋯
  青（安慰）：不过，都好多谢你今晚为我预备所有野⋯⋯
  青一个箭步揽着蓝，蓝咬下唇掩饰失望，藉词转身避开，但躲不了，只好让青在颈项吻了自己一下，青也感受到蓝内心不好过，挣扎中的窘境⋯⋯
  送青回家后，蓝呆呆地坐在车上，望着手中的指环，内心充满怀疑，为什么青不愿意答应？青讨厌一起生活吗？究竟青已经怀孕么？还是想用梦想工作去疏远他？有什么比他还更重要？
  那夜，蓝发了一个梦⋯⋯⋯⋯
  去世的妈妈盘起发髻，掛上围裙哼着歌在小时候老家，从厨房捧着热辣辣出炉的苹果批，插上一支蜡烛，为蓝开心快乐唱着生日歌，蓝感到非常开心甜蜜，但发现枱上少了一隻爸爸的杯子，走到厨房内想找寻⋯⋯一瞬间，厨房外墙忽然倒塌，蓝凌空飞堕百尺深渊中，不能再与父母相见⋯⋯
  夜半时分，蓝喉咙发出悲鸣，眼角流泪惊醒，蓝想起亲生爸爸，知道妈妈怀有自己时，便悄然离家，没有尽过父亲的责任⋯⋯蓝抹乾眼泪告诉自己，千万不要重蹈覆辙，一定要做个比亲生父亲，更负责任的男人⋯⋯